Լոռու մարզի կաթ արտադրողները տագնապած են. գարնան հետ իրենց անարատ կաթի գինը կտրուկ նվազել է. գյուղացու արտադրած մեկ լիտր կաթը 120 դրամ է՝ ձմռան համեմատ 30 դրամով էժան։

«Թվում ա, թե հա՝ էսքան անասուն ունենք, գլուխներս գործի մեջա, ֆերմեր ենք, բայց տակը բան չի մնում: Էկոլոգիապես գերմաքուր մթերք ենք ստանում, ինչը որ կոպեկներով մեզանից տանում են», - պատմում է Կաթնաղբյուր գյուղի բնակիչ Ջոն Կիրակոսյանը, ով մոտ 60 գլուխ խոշոր եղջերավոր անասուն ունի:

Պաշտոնական տվյալներն է առաջ քաշում, ըստ որոնց վերջին երեք տարիներին Հանրապետությունում միայն կթու կովերի քանակը 52 հազարով նվազել է։ Նույն կերպ շարունակվելու դեպքում ասում է՝ ինքն էլ կկրճատի գլխաքանակը:

Համագյուղացի Նորայրը գյուղի կաթ հավաքողն է։ Կաթնաղբյուրից օրական 300 լիտր կաթ է հասցնում քաղաք, հանձնում մեկ այլ միջնորդի, որն էլ իր հերթին 10 դրամ հավելումով հասցնում Տաշիրի գործարան: Հարցին՝ ո՞վ է գին որոշողը, պատասխանում է՝ «զավոդի տերը»:

свернуть