Нью-Йоркте болған лаңкестікке қатысты тергеу жалғасып жатыр. Қазір теракт жасаған Өзбекстан тумасы Сайфулло Саиповке 8 адамды өлтірді және лаңкестік ұйымдарға материалдық көмек көрсетті деген айып тағылып отыр.
Оған ең жоғарғы жаза қолданылуы мүмкін. Қайғылы оқиғадан кейін АҚШ президенті Дональд Трамп грин-карта ойнатылатын лотереяға тыйым салуды ұсынды. Шабуыл жасаған лаңкес жеті жыл бұрын АҚШ-қа осы бағдарлама арқылы келген екен. Құжат өзге ел азаматтарына Америкада тұрақты тұру құқығын береді.
Ал Францияда төтенше жағдай режимі тоқтатылды. Осыдан екі жыл бұрын болған терактіден кейін ел аумағында қауіпсіздік шаралары күшейтілген еді. Ресми Париж қазір терроризмен күресті барынша қатаңдатты. Ел Президенті Эммануэль Макрон Ішкі қауіпсіздік және лаңкестікке қарсы күрес туралы заңға қол қойды. Бұл құжат құқық қорғау органдарының құзырын кеңейтеді.
Үндістандағы жылу электр станциясында болған жарылыс құрбандарының саны артты. Соңғы мәлімет бойынша, қаза тапқандар саны 20-дан асқан. Тағы жүзге жуығы жарақат алды. 22-сі ауыр халде жатыр. Оқыс оқиға Уттар-Прадеш штатында болды. Сондағы жылу электр станциясында қуаттылығы 500 мегаваттық жаңа блок іске қосылуы керек болған. Бірақ блоктан ақау шығып, жұмысшыларды газ бен бу шарпыған.
Қытай билігі елдегі жылу қазандықтарын жаппай электр қуатына көшіріп жатыр. Осылайша экологиялық ахуалды жақсартпақ. Жуырда Бейжің ауаны ластаумен күресу және оның алдын алуға арналған мемлекеттік жоба қабылдаған. Соңғы бес жылда елде осы салаға қатысты 40 шақты реформа жүзеге асырылыпты.
![](https://s2.save4k.ru/pic/tudiK4-6u44/maxresdefault.jpg)