Алматыда жантүршігерлік жол апаты болды. Райымбек көшесінің бойында жүргізіліп жатқан күрделі жөндеу жұмыстарына байланысты жолды бөгеп тұрған патруль тобының өзін көлік қағып кеткен. Небәрі 19 жастағы жігіт жүйткіген күйі жолдың шетінде полицейлер отырған машинаның тас-талқанын шығарды. Дәрігерлер ауруханаға жеткізілген үш қызметкердің екеуінің жағдайы ауыр деп бағалауда.
Жол апаты таңғы үштің кезінде болған. Бұл жол сақшыларының түсірген таспасы. Тас-талқан болған патрульдік машина мен "Фольксваген" көлігі жатыр. Ауыр жарақат алған екі полицей бірден ауруханаға жеткізілген. Аяқ қолдары мен бас сүйектері зақымданыпты. Үшінші қызметкер қайта тек жеңіл дене жарақатын алған. Ал кінәлі жүргізушінің мұрны да қанамаған.
САЛТАНАТ ӘЗІРБЕК, Алматы қаласы ІІД ресми өкілі:
Үш қызметкердің біреуі медициналық көмектен кейін үйіне жіберілген болатын. Тағы екеуі ауыр халде қазір 7-ші қалалық ауруханада.
Анықталғандай, "Фольксваген" көлігінің тізгінінде 19 жасқа енді толған азамат отырыпты. Ол көлікті басқару куәлігін бір ай бұрын ғана алған екен. Тәжірибесінің жоқтығына қарамастан жылдамдықты шамадан тыс асырған. Айтуынша, жол үстіндегі тұрған патрульдік машинаның дабыл қағу сигналын да байқамапты.
Көліктің тұрғанын байқамай қалдым. Қатты келе жатқандықтан, тежегішті басып үлгермедім.
Қазір жол апатына қатысты тергеу амалдары басталды. Ал, қолхатпен бостандықта жүрген жүргізуші тек көлік басқару куәлігінен 2 жылға айырылуы мүмкін.
Мақсат Толықбай, Думан Сүлейменов.

свернуть