Туркия, Истанбул: Ўзбек аёллари ифторлик қилишди, Ўзбегимни танлашди - бугун Туркияда бўлган ўзбекистонликларнинг сони ўн минглаб экани айтилса, улардан катта қисми айнан хотин-қизлар бўлишади.
Бу хотин-қизлардан кўпчилиги меҳнат муҳожирлигида банд ва Туркиянинг Анқара, Истанбул, Измир каби йирик шаҳарларида ишлашади.
Уларнинг орасида Туркияга келин бўлиб тушган ва ҳозир доимий яшаш мавқеида бўлганлари ҳам кам эмас.
Истанбулдаги ифторлик дастурхонини ана шундай аёллардан бир гуруҳи ёзишган.
Улар бунинг учун Истанбул марказидаги "Ўзбегим" кафесини танлашган.
Бу ресторан туркларнинг ўзи томонидан очилганига қарамай, мутлақ ўзбек миллий таомларига ихтисослашгани билан ажралиб туради.
"Ўзбегим"даги ошпазлардан тортиб, хизмат кўрсатувчи персоналгача асосан ўзбекистонликлар бўлишади.
Бу йил ҳисобидан Истанбулдаги ўзбекистонлик аёлларнинг биринчиси бўлган ифторлик дастурхонига йигирма чоғлиқ аёллар йиғилишган.
Дастурхонга, табиийки, шўрва бўладими, сомса, хоним ёки палов, фақатгина ўзбек миллий таомлари тортилган.
Туркиянинг ўзида Рамазон ойига бўлган эътибор хос экани боис, у ерда бўлган кўпчилик ўзбекистонликлар ҳам бу ойга бефарқ эмас.
Қай бир юмуш, ишда банд эканликлари, иқтисодий аҳволларининг қандайин эканига қараб, имкон қадар рўза тутишади.
Мусофирлик ва муҳожирлик ҳаётига қарамай, ифторлик дастурхони ёзиш, бир-бирларини чорлашга ҳам ҳаракат қилишади.
Маълум бўлишича, кетма-кет иқтисодий инқирозлар ва турк лирасининг кескин қадрсизланиши Туркияда меҳнат муҳожирлигида банд ўзбекистонликларнинг топиш-тутишларига ҳам таъсир қилмай қўймаган.
Аммо, шунда ҳам, бу каби вазият уларни Туркияда қолиш ва ишлаш фикридан қайтара олмаган.
Туркияда меҳнат муҳожири бўлган ўзбекистонлик хотин-қизларнинг ўртача даромади $300-400 АҚШ доллари экани айтилади.
Суҳбатимиздан маълум бўлишича, улар топган пулларининг кўп қисмини ортга, Ўзбекистонга, уйларига юборишади.
Энг кўп соғинганлари ҳам она Ватанлари Ўзбекистоннинг руҳи ва ана шу яқинлари, оилалари бўлади.
Айниқса, Рамазон каби муқаддас бир ойда соғинч ҳисси янада кучлироқ билинади, дейишади улар.
Асли ўзбекистонлик влогер Феруза Шокирова Истанбулдаги ана шу ифторликда бўлиб, уни видеотасвирга олган.
Сиз ҳам томоша қилинг.
Ҳозир дунёнинг қай бир бурчагида бўлманг, сиз Рамазон ойини қандай ўтказаяпсиз?
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: [ Ссылка ]
![](https://i.ytimg.com/vi/u7wUc6qi7yE/maxresdefault.jpg)