Në ambjentet e Pallatit të Kongreseve u demonstrua pajisja elektronike e identifikimit të zgjedhësve (PEI) që do të përdoret në zgjedhjet e datës 25 prill 2021.
Për identifikimin e zgjedhësve do të implementohet Sistemi Elektronik i Identifikimit të Votuesve (SEIV) dhe do të përdoren Pajisje Elektronike të Identifikimit (PEI) të vendosura në çdo qendër votimi, të cilat do të sigurojnë identifikimin e saktë të zgjedhësve, bazuar në regjistrin elektronik të mbajtur në pajisje.
Procesi i identifikimit elektronik do të përfshijë të njëjtat parime identifikimi sikurse kryhet në kushte manuale, dhe nuk do të ndryshojë thelbësisht, të zgjasë apo vështirësojë procesin e identifikimit të zgjedhësve.
Për të prezantuar mënyrën se si pajisja do të funksionojë në ditën e votimit, u simulua procesi i votimit.
Identifikimi elektronik i zgjedhësve synon të parandalojë votimin e shumëfishtë dhe votimin për llogari të personave të tjerë.
Zgjedhësi në ditën e votimit do të paraqitet në qendrën e tij të votimit me letërnjoftim ose pasaportë biometrike, për tu identifikuar përmes pajisjes PEI, ku përvec dokumentit të identifikimit do të lërë edhe gjurmët daktiloskopike (shenjat e gishtërinjve), të cilat do të shërbejnë për evidentuar rastet e votimit të paligjshëm.
Aktiviteti u zhvillua në praninë e përfaqësuesve të partive politike, organizatave të huaja dhe vendase, si dhe përfaqësues të medias, të cilët u bënë pjesë e demostrimit të funksionalitetit të pajisjes.
Komisioni Qendror i Zgjedhjeve po mbikëqyr kompaninë e kontraktuar Smartmatic Holding B.V, e cila po punon intensivisht për implementimin e teknologjisë së identifikimit elektronik të zgjedhësve që do të zbatohet në të gjitha qendrat e votimit në Republikën e Shqipërisë.
![](https://s2.save4k.ru/pic/uF7gHP6APG4/maxresdefault.jpg)