Әл-Фараби атындағы Қазақ ұлттық университетінде Орталық Азия елдері ректорларының Бірінші Халықаралық форумы өтті. Форумның ашылу салтанатына Өзбекстан, Қырғызстан, Тәжікстан университеттерінен келген делегациялар қатысты.
Бірінші Халықаралық Ректорлар форумы Орталық Азия елдерінің озық жоғарғы оқу орындары арасындағы серіктестікті дамытып, ынтымақтастықты нығайтуды көздейді. Еліміздің білім және ғылым министрі Асхат Аймағамбетов онлайн байланысқа шығып, жиын Орталық Азия мемлекеттерімен білім, ғылым саласында қарым-қатынасты нығайтып, тәжірибе алмасудағы ерекше маңызын атап өтті. Мемлекет басшысы Қасым-Жомарт Тоқаев биылғы жолдауында: «Жоғары оқу орындары мамандардың сапалы даярлануына жауап беруге міндетті» - деген болатын. Осы ретте сөз алған әл-Фараби атындағы Қазақ ұлттық университетінің Басқарма Төрағасы-Ректоры Жансейіт Түймебаев шетелдік әріптестерімен интеграцияны күшейтудің жаңа бағыттарына тоқталды.
ЖАНСЕЙІТ ТҮЙМЕБАЕВ, Әл-Фараби атындағы ҚазҰУ Басқарма Төрағасы-Ректоры:
– Орталық Азия университеттерімен ынтымақтастығымызды арттыруға мүдделіміз. Ал бүгінгі форум осы тұрғыда өзінің маңыздылығын көрсетуде.
Айта кеткен жөн, жаһандық бәсекеге қабілетті болуда еліміздің 14 жоғарғы оқу орны әлемдік QS үздік университеттер рейтингіне кірген. Форумға қатысушы шетелдік университеттердің ректорлары бүгінгі жиынның үлкен тәжірибе алаңына айналғанын атап өтті.
ГАФУРЗОДА АБДУХАЛИЛ ДАВЛАТАЛИ, Тәжікстан Президенті жанындағы Мемлекеттік басқару академиясының ректоры:
– Форумның маңызына келсек аларымыз да, береріміз де мол. Бүгінгі таңда жоғарғы білім беруде бірегей әрі халықаралық стандарттар туралы ой қозғауымыз керек. Студенттеріміздің мобильді болу мәселесін де басты назарда ұстаймыз.»
Пайдалы пікірталастар жүргізіліп, ұтымды идеялар айтылған бүгінгі форум жұмысының соңында Орталық Азияның ЖОО-ы арасында екіжақты маңызды бағдарламалық құжаттар мен келісімдерге қол қойылды. Сондай-ақ Орталық Азия елдерінің ЖОО Альянсының 2022-2023 жылдарға арналған жұмыс жоспарын дамыту бойынша форумның ұсынымдары қабылданды.


Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

свернуть