Бәріңізге ассалаумағаликум. Украинада тағы бір қазақ тұтқынға түсті. Ол Ресейдің атынан соғысып жүрген сияқты. Мына видеода ол Қазақстанның қазағы екенін айтады. ВИДЕО:
“Мұнда қалай келдің?” деген сұраққа ол “жұмысқа алды”, деп жауап береді. Кейбір ақпараттарға қарағанда ресейлік компаниялар Мариупольдегі құрылыс алаңына ТМД елдерінен жұмысшылар жинап жатыр екен. Бірақ оларды алдап майданға алып баратын көрінеді. Ал әлгі қазақ жігітінің өлі не тірі екені белгісіз. Негізі украиндықтар өз жеріне қарумен келгендердің барлығын өлтіріп тастауға құқылы. Еліміздің сыртқы істер министрлігі болса Украина құзыретті органдарынан Қазақстан азаматтарын тұтқындағаны немесе соғысқа қатысқаны туралы ешқандай ресми ақпарат алмағанын хабарлады. Қазақ азаматтары осылайша ақша үшін Ресейге болысып соғысып жүрсе қазақтың қыздары Украинада бронежилет жасап жүр. 27 жастағы Мадина есімді қазақ қызы Украина мен Ресей арасындағы соғыс басталғанда Берлиндегі жұмысын тастап, Украинада еріктілерге, фельдшерлер мен журналистерге арналған сауыт-сайман шығаратын «Оқ өткізбейтін Украина» компаниясының негізін қалады. Мадина Қазақстанда КИМЭП-те оқыған, бір жылдан кейін Австрияда, содан кейін Германияға көшкен. Артынша Украинаға аттанған. “Соғыс аяқталып, Украина жеңеді деп сенемін. Барлық жаулап алған аумақтар Украинаға қайтарылса, бұл толық жеңіс болады”,- дейді Мадина қыз.
Украина қазір өзінің тәуелсіздігін сақтап қалу үшін ұлт-азаттық күресін жүргізіп жатыр. Украина бірнеше ғасыр патшалық Ресейдің, содан кейін Қызыл империяның отары болған. Сондықтан да олар отаршылдықтың не екенін жақсы біледі. Сол себепті бодандыққа қайта түспес үшін өздерінің тәуелсіздігін сақтап қалу мақсатында жан алысып жан берісіп, азаттық үшін соғыс жүргізіп жатыр. Енді Ермек МҰҚАНҒАЛИЕВтың «Жас алашта» жарияланған сараптамасына зер салыңыз. Қазір ХХІ ғасыр бодандықтың заманы өткен, бірақ та орыс отаршылдары оны мойындағылары келмейді. Ресей президенті Путин 1991 жылғы Совет Одағының ыдырауын «тарихтың қателігі» деп санап, сондағы тәуелсіздік алған республиканы тәуелсіздігінен айырып қайта Совет Одағын орнатып тарихта қалғысы келеді. Сол республикалардың ішіндегі халқы көп Украинаны бағындырып оны дегеніне көндірсе басқа республикалар қарсылық көрсетпей өздерінің дегеніне көнеді деп ойлайды. Сол мақсатта арнайы соғыс операциясын ұйымдастырып, Украинада соғыс жүргізіп жатыр. Оларға қарсылық көрсеткен Украина патриоттарын «ұлтшылдар», «фашистер» деп атап, оларды қырып-жойып көздерін құртпақшы, сол үшін қару-жарақтың жаңа түрлерін ойлап тауып қалаларын қиратып, халқын сусыз, жарықсыз қалдырып, зорлық-зомбылықтың неше түрін жасап жатыр.
Украиндарға көмек қолын созған Батыс елдерін Украинаны орыс дүниесіне қарсы қойып отырған солар, сондықтан да бәріне батыс кінәлі деп, біз қазір батыспен соғысып жатырмыз деп үгіт-насихат жүргізуде. Батыстың Ресеймен үшінші дүниежүзілік соғысқа барғысы келмейтінін жақсы білетін Путин арандатушылыққа барып, оларды атом соғысымен қорқытқысы келеді. Егер де олар Украинаға көмектесуін қоймаса ол атом бомбасын қолдануы мүмкін деп ашық мәлімдейді.
Орыстар болса өздерінің бұл қылмысын ақтау үшін Украиндар мен орыс халқы тілдері, діндері, мәдениеттері бір-біріне жақын туысқан халықтар, сондықтан да олар бірге болулары керек деп үгіт-насихат жүргізуде. Олардың бұл айтқандары сылтау екенін дәлелдеу үшін мынандай мысал келтіруге болады. Жер бетінде ондай туысқан халықтар өте көп. Мысалы қазақ халқына қырғыз, өзбек, татар халықтарының тілі, діні, салт-дәстүрі өте жақын болып келеді. Егер де біз туысқан халықпыз сондықтан да бірге болуымыз керек деп олардың еліне басып кіріп, жерін жаулап, халқын ассимиляцияласақ орыстардың сендердің бұл істеп отырғандарың дұрыс деп айта қоймайтындары анық. Сондықтан орыстардың Украинаға істеп отырған қылмысын бізде дұрыс деп айта алмаймыз.
Мәскеудің телеарнасында Драбинцкий деген біреу «Ресей, Украинадан кейін Қазақстанға кіруі керек» деген болатын. Сонда да сендердікі дұрыс деп отыра береміз бе? Президент Қасым-Жомарт Тоқаев Ресейдің Украинада жүргізіп отырған саясатына байланысты Қазақстанның позициясының қандай екенін Путиннің көзінше айтқан болатын.
Совет Одағы ыдырағаннан кейін Шешенстанға, Молдаваға, Грузияға, Украинаға соғыс ұйымдастырып отырған Ресей болатын. Батыс Ресейдің 1 шаршы метр жеріне де тиіскен жоқ. Сондықтан да Путиннің айтқан арандатушылық саясатын дүниежүзілік үшінші атом соғысына жетпей тұрғанда адамзат баласы оған қарсы шара қолданып, соғыстың бетін қайтарулары керек.
Егерде Путиннің Украинадаға арнайы соғыс операциясы іске асса, келесі Ресейдің құрбаны Қазақстан болатыны анық. Сондықтан да Қазақстан осы кезден бастап бұл апатқа қалай қарсы түрып, қалай қорғануға болатынын ойлануы керек.
Меніңше, бұған қарсы тұрудың бірден-бір амалы бірінші кезекте Ресейдің бұл жоспарын әшкерелеп, халыққа түсіндіретін идеология қажет. Осы идеология арқылы Ресейдің отаршылдық саясатын әшкерелеп, қазақ халқының санасына сіңіре білуіміз керек.

свернуть