Алдағы 5 жылға арналған агроөнеркәсіптік кешенді дамыту бағдарламасы 8 міндетті қамтиды. Олар – шағын және орта шаруашылықтарды кооперацияға біріктіру, су және жер ресурстарын тиімді пайдалануға жағдай жасау. Осы орайда апатты жағдайдағы 41 су қоймасы қалпына келтіріліп, 22-сі жаңадан салынбақ.

Бұған қоса ауылшаруашылық техникасы және химиялық құралдармен қамтамасыз ету, ішкі нарықта сұранысқа ие өнімдермен қамтып, елдің экспорттық әлеуетін арттыру міндеттері тұр алда. Бұл жоспарды жүзеге асыру үшін барлығы 134 іс-шара қарастырылған. Ал оған жұмсалатын қаржы қомақты.

Қайрат Айтуғанов, ҚР Ауыл шаруашылығы министрінің бірінші орынбасары:

-Жалпы бұларды іске асыру үшін 2,4 трлн теңге қажетті. Оның ішінде республикалық бюджеттен 1,2 трлн, жергілікті бюджеттерден 852 млрд теңге, халықаралық қаржы ұйымдары мен отандық шаруашылық субъектілерінен 306 млрд теңге қарастырылған.

Бұдан бөлек, шағын және орта бизнесті дамытып, жұмысты ширату үшін салық саясатына бірқатар өзгерту енгізілмек. Ол үшін қазір бірнеше орган қызу жұмыс істеуде. Олар бүгін жаңа салық кодексінің жобасын талқылады. Ұсыныстар көп. Дені арнайы салық тәртібін жетілдіру, бірыңғай жер салығы және кірістер мен шығыстарды есептеудің жеңілдетілген тәртібі туралы. «Бірақ шағын шаруашылықтарда есеп жүргізетін бухгалтерлер жоқтың қасы», – дейді фермерлер.

Әуезхан Дарынов, Қазақстан фермерлер қауымдастығының президенті:

-Мүмкіншілік беру керек. Бүгінгі министрліктер санау керек дейді. Бүгінде 185 мың фермерде 5 пайыз ғана бухгалтерлер бар. Енді ойлаңыздар, барлығы бухгалтер болу үшін қанша уақыт керек?!

Отандық бизнес қысым көрмей еркін жұмыс істеуі тиіс. Бұл – Елбасының қойып отырған талабы. Мәселен, қазір елімізде кәсіппен айналысу үшін кемінде 82 бапты білу қажет екен. Ал оның ішіндегі тармақтарын қоса есептесеңіз, 200-ден асып жығылады. Бұл орайда депутаттар кәсіпкерлер өзі білетін іспен айналысуы тиіс. «Мақсат есеп-қисап үйрету емес, отандық бизнесті дамыту», – дейді.

Тарас Хитуов, ҚР Парламенті Мәжілісінің депутаты:

-Біз депутаттар ретінде салық тәртібін жеңілдетуді талап етеміз. Фермерлер тек өз ісімен айналысуы тиіс. Ол жеңілдетілген жүйе бойынша салық төлесе болды. Сондықтан бізге фермерлердің жұмысын күрделендірмей, оларға көмектесетін заң қажет.

свернуть