ONE.COM.MT • Se ngħaddu issa għal aktar aħbarijiet mill-awli tal-Qorti.
KITBA: ANDREW SPITERI / AYMEN GRECH PACE
FILMAT: ARKIVJI
Battalja legali bejn żewġ kumpaniji ewlenin tal-jets privati, stabbiliti Malta, fejn qed jintalbu danni ta’ mijiet ta’ miljuni ta’ ewro, qed titqies bħala waħda mill-akbar li qatt seħħew fil-qrati Maltin.
Il-kumpanija Vistajet qed tallega li sofriet mat-€386 miljun f’danni mill-kumpanija rivali AirX, hekk kif din allegatament wettqet kampanja ta’ miżinformazzjoni, f’dik li ġiet deskritta bħala gwerra kummerċjali.
Fil-kawża, il-VistaJet issemmi kif din il-kampanja kienet intiża biss biex timmina r-reputazzjoni u l-fiduċja tal-investituri tagħha, wara li l-informazzjoni tat interpretazzjoni ħażina tas-saħħa finanzjarja tagħha.
Fil-kawża, quddiem l-Imħallef Toni Abela, ġiet ippreżentata sensiela ta’ messaġġi tal-WhatsApp, imwaqqaf mill-fundatur tal-AirX, John Matthews, fejn ixxerrdet miżinformazzjoni kontra r-rivali Vistajet u s-sid tagħha Thomas Flohr.
Minbarra hekk, il-kampanja tferrxet b’rapporti allegatament malafamanti li dehru fil-Financial Times u fil-Wall Street Journal, li jingħad li ħolqu danni kbar kummerċjali.
It-talba fil-Qorti Maltija qed tesiġi, li jinħareġ mandat ta’ sekwestru fuq il-ħaddiema tal-AirX, biex jiġu salvagwardjati l-pretensjonijiet ta’ Vistajet.
MIXLI LI B’ĦAMES SERQIET U ĦSARAT
Raġel ta’ 38 sena tressaq quddiem il-Qorti wara li ġie mixli li wettaq ħames serqiet differenti u li għamel ħsara fi ħwejjeġ ħaddieħor.
Anthony Zammit kien akkużat li, fil-ġimgħat li għaddew, żamm għandu affarijiet misruqin, flimkien ma’ persuna oħra, saq mingħajr liċenzja u polza tal-assigurazzjoni, waqt li għamel dawn ir-reati meta kien taħt sentenza sospiża.
L-akkużat wieġeb ħati għall-akkużi miġjuba kontrih, filwaqt li ġie kkundannat għal sentejn ħabs sospiżi għal erba’ snin u multa ta’ ftit inqas minn ħamest elef ewro.
Il-Qorti ordnat ukoll li l-liċenzja tas-sewqan ta’ Zammit tiġi skwalifikata għal perjodu ta’ sena, filwaqt li s-sentenza li kellu qabel ta’ sitt xhur ħabs sospiżi tidħol fis-seħħ mil-lum u li jħallas ftit inqas minn elfejn ewro f’danni lill-vittmi.
![](https://s2.save4k.ru/pic/wLGU06JUlPI/mqdefault.jpg)