Magwak wlitobanik mazal8mpskwikwatisal, kanwa achi wakaswak aln8bak tal8wzobanik sowanakik ta W8banakiak tal8wzobanik pbonkik. Ni 8tlokaw8ganis, n8badah8ma kchi nod8tlokajik ta8lawi s8gm8 Henry Lorne Masta ta Nicole O’Bomsawin, 8dok8dam neg8nigek w8banakiimazal8mpskwikwatiskaw8gan ta achi nebiikz8wadow8gan.
Nd’8tlokaw8 kiow8k wji wakasnolsisal w8banakiin8wadial kdakinak ta N’sidaldam K’kzaldamen8 nwski8tlokaw8gan.
Pm8wzowinnoak aobanik menahanek nan8wiwi kchinmahomaktegok. Kasogamigwezobanik kwanigamikwikok ni n8kskwasis aliwizit Ngweji wigob nitali nspiwi agm8w8, ngwitoskwa wigw8mek.
Ngweji wiag8wzob ta wlakamigwezob waïjiwi. Waosp8zaki, chiga mamij8lak tokobanik ta sipsak talkwazobanik, agma alamikaw8bani mziwi wlakamigwezoma. Ni agma idamenob wliwni wakasnol 8wdik. Nitamagimgwak, agma idamenob wliwni kizosek, ni asokwikok, chiga nigik kchi kiokannowinnoak padosabanik. Waïjiwi, n8kskwasis maagenemenob senal ta agma idamenob wliwni achi neg8ni wmahomaïkok nanat8wazijik ni kza8zitaw8bani nigik. Agma wlidaanob ta alamizob.
Kanwa wlakamigwezoma tadbaldamob, nan8baligob wji migak8mabanik. Kzel8msen ta almosak todosaobanik kanwa asma idamobanik wliwni.
Siwaldamit, Ngweji kizi alosa sp8ziwiwi senojiwik. N8kskwasis kadaw8dokab kanwa nda wawaldamowib. Agma mlisjab wskijiwi ktapskok ni k8g8lwaw8ganal pnilhabanik nebik. Salakiwi n8kskwasis kizi nodam nokigek wliphanemiklozow8gan. Klozow8gan idamob : « Kagwilla aw8sis? ». Ngweji kwalhiazob ta kizi nadodmawa na klozow8gan : « awani na? ».
– N’nebigi, ni awani kia?
– Nd’aliwizi Ngweji, n8kskwasis wigw8mek.
– Kagwi wji mlisj8an?
– Nlakamigwezom migak8ma wigw8mek ni pita N’siwaldam, kizi idam.
– N’kiziba wijoka kia. Nimska kwigw8mek kigawesimazal8mpskwikwatis ta kmit8gwesipakwal. K’n8ji wlitbatobna wakasnol.
Ngweji kizi kz8malha 8wdik lli wwigw8mek. Agma kizi wdnem wigawesimazal8mpskwikwatisa pasojiwi skweda wmit8gwesipakwal pidigalzow8ganek ni kizi pedgipaïa senojiwi nebik.
Ngweji kwalhiazob wji kabasak askawihabanik agma nebik. Nebiiklozow8gan kizi idam : « kadna wzigwa8n ni pona iolil al8miwi mazal8mpskwikwatisek ». Ngweji pita kizi kziponem mziwi. Ni klozow8gan kizi idam : « nikw8bi mildo mazal8mpskwikwatis namasikok. Nigik namasak n8ji padon8 ni kwatis alagwidemak ta 8daboakji. Adoji N’nanawaldamji migak8maw8ganal wji kwigw8mek ». Ngweji kizi mildo mazal8mpskwikwatis kabasaïkok ni iogik kizi wadosak.
Achakwikwik, Ngweji kizi 8mki, ni kizi alamikawa wigawesa ta agma kizi alamikawa achi. N8kskwasis kizi alamikawa wlakamigwezoma ta agma kizi alamikawa achi. Ni agma kizi saosa ta kizi papi nspiwi almosak ta kzel8msen.
S8waïwi, askwa K’meskamobna sigwaniwi, chiga tokskwat, pkwaïmazal8mpskwikwatisal ta wzigwa8nal chiga nebiiniwaskw pakito nilil. Kizilla agma kizi poniado Ngwejiwakasnol nitali?
