G20 саммитіне шақырылуы – Қазақстанға көрсетілген зор құрмет. Қытайға жасаған сапарын қорытындылауға арналған брифингте Нұрсұлтан Назарбаев осылай деді. Отандық журналистерге берген сұхбатында Елбасы «Үлкен жиырмалықтың» жиыны мен саммит аясында өткен кездесулердің маңызына тоқталды.
Президенттің айтуынша, жаһандық экономикадағы қазіргі жағдай көп елдің дамуын тежеп тұр.
Дамушы мемлекеттер былай тұрсын, Еуропалық одақта да жағдай мәз емес. Саммитке қатысушы елдер осы тығырықтан шығудың жолын қарады. Жиынның мәртебелі мейманы атанған Нұрсұлтан Назарбаев бұл тұста бірқатар нақты ұсыныс айтты.
Елбасы: «Экономика және қаржы мәселелерін реттейтін біртұтас жаһандық ұйым керек», – деді. Әрі әлем экономикасының тамырына қан жүгірту үшін жаңа индустриялық революция қажет екендігін айтты.
Нұрсұлтан Назарбаев, Қазақстан Республикасының Президенті
-Қазақстанды ең ірі мемлекеттердің саммитіне шақыруы – ҚХР-дың Қазақстанға көрсеткен ең үлкен құрметі. 20 ең зор мемлекеттің басшылары жиналғанда, барлық планетаның арасында жүргендей болып көрінесің. Мен сөйлескен Үндістан Премьер-министрі Қытаймен жеке келіссөздер жүргіздік. Еуропаның, Англияның басшылары, Барак Обамамен жақсы әңгіме болды. Ол енді кетіп бара жатыр. Дегенмен 8 жылдағы бірге істеген жұмысымызды қорытындылап, екі елдің арасындағы қарым-қатынас дұрыс болды, жақсы болды деген қорытындыға келдік. Сондықтан еліміз үшін дұрыс, керекті сапар болды деп ойлаймын. Біз Қазақстанымызды дүние жүзіне тағы бір рет көрсетіп, ірі-ірі басшылармен келіссөздер жүргізуге қол жеткіздік.
Брифинг барысында Нұрсұлтан Назарбаев Астана мен Бейжің байланысының басым бағыттарына тоқталды. Саммит қарсаңында Қытай төрағасы Си Цзиньпинмен өткен кездесудің нәтижелерін айтып берді.
Тараптар Қазақстанның ауыл шаруашылық өнімдерін Қытайға экспорттауға уағдаласты. Бұдан бөлек логистика, көлік саласындағы ынтымақтастықты тереңдетуге келісті.
Елбасының айтуынша, алдағы бес жылда Қазақстанда Қытай капиталының қатысуымен 50 жаңа кәсіпорын бой көтереді. Дені дайын өнім шығаруға бағытталған. Жобалардың жалпы соммасы – 26 млрд доллар. Айта кетейік, былтыр екі елдің сауда айналымы 10 млрд доллардан асқан. Алдағы уақытта Қазақстан мен Қытай әскери ынтымақтастықты да артыруға ниет танытып отыр. Қазақстан Қытайдың кибер-қауіпсіздік саласындағы жаңа технологияларын игеруге дайын.
Нұрсұлтан Назарбаев, Қазақстан Республикасының Президенті
-Қазіргі уақытта дүниедегі барлық қаржы орталықтары жабық кезде, ешкімге бермей жатқан кезде Қазақстанға қарай осындай көңіл бөлуі экономикамыз үшін өте пайдалы. Ал енді ауыл шаруашылығына келетін болсақ, тұңғыш рет Қазақстанның бидайын, басқа да дәнді-дақылдарды, өсімдік майын, ет, нан дегенді Қытайға беру мәселесіне келістік. Биылғы жылы астық бізде де мол, Ресейде де мол. Қиын болып жатқан кезде 500 мың немесе 1 млн тоннаға жақын астықты Қытайға шығаратын болсақ, біздің ауыл шаруашылығы компаниялары үшін бұл өте пайдалы болады. Инфраструктура, жол салу мәселесі, өздеріңіз білесіздер, Қазақстанда жүріп жатыр. Тұрғын үй салуға, соның барлығын қаржыландыруға Қытай компаниялары, банктері өз үлесін қосатын болады.
![](https://i.ytimg.com/vi/x744BQuHjvQ/maxresdefault.jpg)