Бүгін Россия -24 арнасына Президент Қасым-Жомарт Тоқаевтың сұхбаты шықты. Мемлекет басшысы саяси өзгерістер, үш жылдық президенттік мерзімі, қаңтар оқиғасы сияқты мәселелерге тоқталды. Мемлекет басшысының айтуынша, Қаңтар оқиғасы бойынша ұсталғандардың біршамасын туыстарының өтінішімен босатқан. Әзірге тек 26 адам ғана сотталыпты. Дегенмен, тергеу жалғасып жатыр деді Президент. Сонымен қатар, Тоқаев мырза елде тынышсыздық басталғанда, бір азаматтар ұшақпен немесе тікұшақпен елді тастап кет деп ұсыныс жасағанын, бірақ өзінің елде қалу туралы шешім қабылдағанын айтты. Ал осы кезде Қазақстанға шақырған ынтымақтастық ұйымына қатысты былайша пікір білдірді.
ҚАСЫМ-ЖОМАРТ ТОҚАЕВ, Қазақстан Республикасының Президенті:
– 30 жылдың ішінде Ұжымдық Қауіпсіздік ұйымы алғаш рет Қазақстанға шектеулі әскери контингент жөнелтті. Мәселе Ресейде емес, бүтіндей бір ұйым туралы айтып отырмын. Көрші елде кейбір тұлғалар бұны бұрмалап, Ресей Қазақстанды құтқарды, ал енді Қазақстан Ресейге қашан да қызмет етіп, аяғына жығылуы керек деген жел сөз таратып жүр. Бұл қате пікір және шындыққа жанаспайды. Қазақстан Ұжымдық Қауіпсіздік ұйымының белсенді қатысушысы.
Президент Ресей Құдай қосқан көрші, әрі Одақтас ел. Сондықтан Қазақ елі қазіргідей қиын-қыстау кезеңде өз Одақтасынан сырт айналмайды деп нақтылады. Бірақ Ресей тарапына салынған санкцияны да ұмытпауымыз керек. Біз бұл санкция ережелерін бұзбауға тырысып бағудамыз. Өйткені біздің экономикаға да әсер етуші қосымша санкциялар енгізілмеуі керек. Дегенмен, осының бәрін ескере отырып, біз Ресей үкіметімен тығыз қатынаста жұмыс істеп, кезекті келісімдерге қол жеткізіп жатырмыз деді мемлекет басшысы. Қасым Жомарт Кемелұлы қазақ тілінің болашағына қатысты да сөз қозғады. Айтуынша, Қазақ жерінде орыс тілі шеттетіліп, мектептері жабылып жатыр деген уәж қисынға келмейді. Бірақ қазақ тілін дамыту уақыттың талабы екенін нақтылады.
ҚАСЫМ-ЖОМАРТ ТОҚАЕВ, Қазақстан Республикасының Президенті:
– Қазақ тілінде білім алуға сұраныс әлдеқайда артып келеді. Біз бұған мән беруіміз керек. Қазақстанда қазақ тілін білгісі келетіндердің, балаларын қазақ тілді бала-бақшалар мен қазақ тілді мектептерге бергісі келетіндердің мүддесін қорғауымыз керек. Бұл жерде бәрі де түсінікті деп ойлаймын!
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#Тоқаев #Россия24 #сұхбат #ҚаңтарҚасіреті #ҰҚШҰ
