«Нәтижелі жұмыспен қамту және жаппай кәсіпкерлікті дамыту» бағдарламасы өңірде қалыпты жүргізілмей жатыр. Сондай-ақ, жұмыссыздарды жұмыспен қамту белсенділігі де төмендеп кеткен. Оған қоса, мемлекеттік бағдарламалар жайында насихат жұмыстары төмен. Аймақ басшысы аппарат жиынында жергілікті әкімдер мен сала басшыларының жұмысын қатаң сынға алды.
Өткен жылы кәсіпкерлік пен ауыл шаруашылығына бюджеттік қаражаттан 21 млрд. теңгеден астам қаржы бөлінді. Ал, қалаларда биыл шағын несиеге 1 млрд. теңгеден астам қаражат берілді. Дегенмен, өңірде жұмыссыздық деңгейі 4,9%-дан 5%-ға өсе түскен. Мемлекет қаржысы дұрыс жұмсалмай, ауаға ұшып жатыр. Ауыл адамдары мемлекеттік кәсіпкерлікті қолдау бағдарламаларын білмейді. Бәлкім, жергілікті шенеуніктердің өздері де ол туралы хабарсыз болуы мүмкін.
Кәсіпкерлік басқармасы басшысының айтуынша, моно қалаларда шағын несиенің максималды сомасы 18 млн. теңге, сыйақы мөлшері жылына – 6% болады. «Сәуірде 273 млн. теңгеден астам қаржы Даму» қорына аударылды. «Даму» қоры кәсібін енді бастаған кәсіпкерлерге несие алу үшін 85%-ға дейін, бизнесін жүргізіп жатқандарға 50%-ға дейін кепілдік береді. Бүгінде, жылдық соманың 28%-игерілген. 2017 жылы ауылдағы кәсіпкерлікті дамытуға 3 жарым млрд. теңге бөлінді.
Бағдарлама аясында өңірде жұмыссыздарды жұмылдыру белсенділігі төмен. Мемлекеттен субсидияға мол қаржы бөлінгенімен, өнім көлемі аз өндіріледі. Салық, өндіріс көлемі, жұмыс орындары бойынша қайтарым қандай екенін жан-жақты зерттеу керек. Облыс әкімі экономика және қаржы басқармасына бір апта көлемінде мемлекеттік қолдаудың тиімділігі жайлы толық ақпарат дайындауын тапсырды.
![](https://s2.save4k.ru/pic/xKoYIV6q25c/mqdefault.jpg)