ՔՈ ՁԱՅՆԸ [ Ссылка ]
Գյումրի-Երևան և հակառակ ուղղությամբ աշխատող երթուղայինները այսօր առավոտից չեն աշխատել: Բազմաթիվ զայրացած քաղաքացիներ մի քանի ժամ ավտոկայանում ապարդյուն սպասելուց հետո ահազանգել են ԳԱԼԱ հեռուստաընկերություն: Օրվա ընթացքում առաջին երթուղային տաքսին ավտոկայարան ժամանեց 10:30-ի սահմաններում: Գյումրի-Երևան երթուղին սպասարկող «Տրանս ակնթարթ» ընկերության տնօրեն Հովհաննես Գևորգյանը ստեղծված իրավիճակը բացատրում է նրանով, որ այսօր Երևանում անցկացվում է Գյումրի-Երևան երթուղու մրցույթը, որի պատճառով ընկերության բոլոր 17 մեքենաները և վարորդները գտնվում են Երևանում: Նշենք, որ քաղաքացիները նախապես հայտարարության տեսքով տեղեկացված չեն եղել, որ մեքենաները չեն աշխատելու, իսկ ընկերությունը վերջիններիս նաև այլընտրանք չի առաջարկել: Ինչո՞ւ այլ տրանսպորտային միջոցի կամ ընկերության հետ պայմանավորվածություն ձեռք չի բերվել, որոնք մրցույթի ընթացքում կսպասարկեին քաղաքացիներին հարցին ընկերությունից պատճառաբանեցին, որ իրենք պատասխանատու չեն այլ մեքենաների սպասարկման որակի հետ կապված, ուստի իրավասություն չունեն դրանք շահագործելու: Դիտարկմանը, թե այդ դեպքում 10:30-ի սահմաններում ի՞նչ երթուղային տաքսի շարժվեց դեպի Երևան, ընկերության տնօրենը նախ նշեց, որ տեղյակ չէ և այդ երթուղային տաքսին չի տեսել, ավելի ուշ մեկ այլ աշխատակից հիշեց, որ դա ընկերության մեքենան է, որը մրցույթի ընթացքում զննումն ավարտել է և, վերադառնալով Երևանից, սկսել աշխատանքը: Նշենք, որ երթուղու մրցույթին Գյումրիից մասնակցում է միայն «Տրանս ակնթարթ» ընկերությունը, որտեղից հավաստիացրեցին, որ համաձայն մրցույթին ներկայացված հայտի` ուղեվարձը գնային փոփոխության չի ենթարկվելու: Նշենք, որ «Տրանս ակնթարթ» ընկերությունը պատկանում է ԱԺ պատգամավոր Մարտուն Գրիգորյանի ընտանիքին:
