КСРО мен Қазақстанның халық артисі, Халық қаһарманы Роза Бағланованың туғанына 100 жыл толды.
Биыл Роза Тәжібайқызының ғасыр тойы республика көлемінде атап өтіледі.
ҚР Мәдениет және спорт министрі Дәурен Абаев қазақ мәдениеті мен өнерінің дамуына өлшеусіз үлес қосқан, әншілік өнерімен қатар қоғамдық-саяси өмірге етене араласып, қайраткерлік қырымен де кең танылған тұлғаның ғасыр тойына байланысты: "Атап айтқанда, ЮНЕСКО көлемінде Роза Бағланованың 100 жылдығына арналған мерейтойлық концерт өткізуді жоспарлап отырмыз. Одан бөлек Қызылорда, Алматы, Мәскеу қалаларында әншінің шығармашылығына арналған мерейтойлық концерттер, елордамызда «Халық қаһарманы» Роза Бағланова атындағы Халықаралық вокал конкурсын ұйымдастыру көзделіп отыр. Осы іс-шаралар арқылы бұлбұл әншінің бірегей шығармашылығын, ғибратты ғұмырын, қайраткерлік қасиеттерін көпшілікке насихаттап, өскелең ұрпаққа үлгі етуді мақсат тұтып отырмыз" деп айтқан болатын.
Роза Тәжібайқызы Бағланова 1922 жылы 1 қаңтарда Қызылорда облысының Қазалы өңірінде туған.
1941 жылы Қызылорда педагогикалық институтын бітіріп, өнер жолын Ташкент филармониясының ән-би ансамблінде әнші болып бастады. Ансамбль қатарында Екінші дүниежүзілік соғыс жылдары майдан даласында өнер көрсетіп, 1945 жылы 9 мамырда Берлиндегі жеңіс концертіне қатысқан.
1947-1949 жылдары Қазақ опера және балет театрының, 1949-1960 жылдары – Қазақ филармониясының, 1960 жылдан бері – Қазақконцерттің әншісі болып, ұлттық ән өнерін дамытуға зор үлес қосқан.
1946 жылы Мәскеуде өткен бүкілодақтық эстрада әншілері конкурсының дипломаты, 1949 жылы Бухаресте өткен бүкіл дүниежүзілік Жастар мен студенттердің 2-фестивалінің лауреаты атанды. Ленин, Еңбек Қызыл Ту, «Халықтар достығы» ордендерімен, «Шапағат» медалімен марапатталған.
Роза Тәжібайқызы Бағланова 2011 жылы 8 қаңтарда Алматыда 89 жасында дүниеден өтті.
2021 жылы 24 қарашада ЮНЕСКО-ның 2022-2023 жылдарға арналған халықаралық мерейтойлар тізімі қабылданып, оған Қазақстанның ұсынысымен Роза Бағланованың 100 жылдығы енді. Қазақтың танымал әншісінің мерейтойы ЮНЕСКО көлемінде аталып өтеді.
Ещё видео!