Վանաձորում տոնական օրվա նախապատրաստական վերջին շտրիխներն են: Կանաչ քաղաքը նաև մաքուր պետք է դիմավորի հյուրերին: Քաղաքի տոնի գլխավոր իրադարձությունը քաղաքապետի գնահատմամբ՝ շինարարական աշխատանքներն են: Վանաձորում իրականացվում է մեկ միլիարդ 100 մլն դրամի շինարարություն:

Տոնական միջոցառումները սկսվեցին քաղաքապետարանում: Մամիկոն Ասլանյանն ընդունեց տարբեր երկրներից ժամանած Վանաձորի քույր քաղաքների ներկայացուցիչներին:

Ընդունելությունից հետո Գուգարաց թեմի առաջնորդը հանդես եկավ միասնական աղոթքով:

Վանաձորի օրվա առթիվ առաջին հանդիսավոր բացումը տեղի ունեցավ Զորավար Անդրանիկի փողոցում, որտեղ բացվեց մեծ զորավարի արձանը:

Կեսօրին վանաձորցիներին միացավ Վարչապետ Նիկոլ Փաշինյանը:

Վարչապետին ու նրա կնոջը դիմավորեցին կրծքանշանով. քաղաքի տոնի առթիվ Վանաձորում այն այսօր բոլորն են կրում: Վարչապետի այցի առաջին հասցեն Կերպարվեստի թանգարանն է, որտեղ շարունակվում են նորոգման աշխատանքները:

Տոնական օրվա զարդը դարձավ քաղաքի կենտրոնական հրապարակում շատրվանների բացումը: Բացառիկ լուսաձայնային հնարավորություններով շատրվանների գործարկումն ուղեկցվեց համերգային ծրագրով: Տիգրան Մեծ պողոտայում էլ ընթանում էր «Հնարավորությունների քաղաք» խորագրով ցուցահանդեսը:

свернуть