Ötən gün şəhər ərazisində fəaliyyət göstərən Bank Olmayan Kredit Təşkilatının ofisindən seyfi oğurlayanlar saxlanılıb. Lənkəran polisinin apardığı əməliyyat tədbirləri nəticəsində məlum olub ki, oğrulardan biri elə təşkilatın öz işçisidir.
Lənkəranda bank olmayan kredit təşkilatının əməkdaşı Ruslan Əzimov çalışdığı ofisi qarət etmək fikrinə düşüb. 2017-ci il yanvarın 24-ü gecə saatlarında o tanışı Əvəz Əkbərovla birlikdə ofisdəki seyfi oğurlayıblar. Daha sonra Əvəz Əkbərov seyfi açmaq üçün tanışı, usta kimi tanıdığı Ruslan Kərimovun yanına aparıb. Ruslan Kərimovun dediyinə görə isə Tanışı Əvəz ona seyfin özünə aid olduğunu, sadəcə açarı itirdiyini bildirib. Seyfin oğurluq olduğunu isə Ruslan sonradan öyrənib.
Seyf açıldıqdan sonra Əvəz Əkbərov oradakı pulu və qızılları götürsə də Lənkəran şəhər rayon polis şöbəsinin əməkdaşlarının isti izlərlə həyata keçirdikləri əməliyyat tədbirləri nəticəsində heç bir gün keçməmiş o, və əlbir olduğu Ruslan Əzimov saxlanılıblar. Oğurlanan seyfin içərisindən vətəndaşlardan girov qismində götürülmüş qızıl zinət əşyaları, təxminən 8 min manat, 4850 dollar pul, qurumun rəsmi sənədləri və möhürü olub.
Saxlanılan şəxslər oğurlanan pulları və qızıl zinət əşyalarını polisə təhvil veriblər.
