Ижтимоий тармоқларда ҳам кузатинг:
[ Ссылка ]
* * *
Мен сенга мактублар ёздим
ҳар оқшом,
сўзлар сеҳрларкан ҳар тарафингни.
Эҳтимол,
юзингга босдинг индамай,
эҳтимол, оҳиста босдинг лабингни...
Шу дамда сесканиб бирлашди руҳлар,
ҳасратлар баробар ушладилар қўл.
Сени излаб кетдим
дунёма-дунё,
мени излаб келдинг,
сен ҳам йўлма-йўл...
Қаршингда ўзини тўкаётган ким,
ҳарфма-ҳарф, сўзма-сўз, ахир хатма-хат?
Билмайман,
азобми, қувончми, бизга -
қайси мактубини атар муҳаббат...
Онг-у вужудимда бир титроқ ёнди,
хаёлга айланди, тасодиф - висол.
Энди, ҳар нафасда чорлайман,
жоним,
келақол, келақол, келақол...
Тор хонамга тўлди бетил қоғозлар,
Қўлларим ингради қаламдан нари.
Деразамга ўзин урди дунёнинг,
қанотли, беқанот кабутарлари...
Кечир!
Ёзолмайман, тилимда сўз йўқ,
наҳот, кўролмадинг дилдан нарини...
Қайси осмон ахир қабул қилар, айт,
сенсиз кўзларимнинг муждаларини?
Қаламни синдирдим.
Бариси тамом,
бир сирни айтаман, тинглагин, қадим:
"Нигоҳимдан кўчар нигоҳларингга,
кўнглимда яширин энг гўзал хатим..."
Мен сенга мактублар ёздим
ҳар оқшом...
25 июл, 2020
Ещё видео!