Արցախի նախագահ Բակո Սահակյանը ընդունել է Հայաստանի խորհրդարանի ԼՀԿ խմբակցության ղեկավար Էդմոն Մարուքյանին ու պատգամավոր Մանե Թանդիլյանին: Հանդիպման ընթացքում խոսվել է խորհրդարանական կապի զարգացման, ներքին ու արտաքին քաղաքական հարցերի մասին:
Էդմոն Մարուքյանի Արցախ այցն ու Բակո Սահակյանի հետ հանդիպումը թերեւս չէր արժանանա նկատելի ուշադրության, եթե չլիներ երկու հանգամանք: Մի քանի օր առաջ ԼՀԿ նախագահը իր նախաձեռնությամբ սրճել էր Հայաստանի վարչապետի հետ եւ խոսել Արցախի հարցից: Հանդիպումից անմիջապես հետո նա հայտարարեց, որ հարցի առնչությամբ չունի ոչ մի մտահոգություն եւ չի քննարկվում որեւէ փուլային տարբերակ:
Հաջորդ օրը՝ մայիսի 8-ին, խորհրդարանում տեղի ունեցավ հայտնի միջադեպը, երբ Սասուն Միքայելյանի հետ Մարուքյանի լեզվակռիվը ավարտվեց բախումով, Միքայելյանը, իսկ հետո մի քանի իմքայլական պատգամավոր հարվածեցին Մարուքյանին: Դրան էլ հաջորդեց Մարուքյանի հասցեին Նիկոլ Փաշինյանի կոշտ ելույթ, որի էությունն այն էր, որ Մարուքյանը «քոչարյանա-սերժական սադրիչ» է:
Հիմա, ի՞նչն է տարել Էդմոն Մարուքյանին Արցախ՝ Նիկոլ Փաշինյանի հետ սու՞րճը, թե՞ Սասուն Միքայելյանի հետ կռիվը: Մայիսի 9-ին Հաղթանակի տոնի առիթով Արցախում էր Նիկոլ Փաշինյանը, Հայաստանի խորհրդարանի նախագահ Արարատ Միրզոյանի հետ: Ընդ որում, Երեւանից այդպիսի ներկայացուցչական պատվիրակության հանգամանքը հետաքրքիր է: Համենայն դեպս, կորոնավիրուսային հատուկ ռեժիմի պարագայում:
Հնարավոր է ենթադրել, որ Արցախում տոնական ոգեւորությունից բացի, քննարկվել են նաեւ քաղաքական հարցեր, ինչի մեկ այլ վկայություն է նաեւ այն, որ Նիկոլ Փաշինյանի որոշումով մայիսի 11-13 Արցախ է գործուղվում նաեւ անվտանգության խորհրդի քարտուղար Արմեն Գրիգորյանը:
Արցախը եղել է, կա, եւ թերեւս կլինի հետխորհրդային անկախ Հայաստանի ներքաղաքական կյանքի յուրօրինակ «մատրիցա», երբ բնազդաբար, ենթագիտակցաբար, կամ միանգամայն գիտակցված, անելանելի վիճակներում «բոլորը դիմում են Արցախին»: Ընդ որում, այստեղ խնդիրը Արցախն է, ոչ թե նա, ով տվյալ պահին նախագահում կամ ղեկավարում է Արցախը:
Որովհետեւ երկու շաբաթ անց Արցախն ունենալու է գործող նոր նախագահ: Բայց հազիվ թե Երեւանից դեպի Արցախ այդ մեծ հոսքը պայմանավորված է լոկ այդ հանգամանքով: Ըստ ամենայնի, հարցն այն է, որ այդ հանգամանքը տեղավորվելու է Հայաստանում գալիք նոր որոշակի իրողությունների համատեքստում: Չի բացառվում, որ նաեւ այդ պատճառով Էդմոն Մարուքյանը փորձել է հետ չմնալ, կամ դուրս չմնալ եւ հատուկ նշանակության օժանդակություն ստանալ Արցախում: Բանն այն է, որ վարչապետի հետ հանդիպումն ու հաջորդած հայտարարությունը հուշում էին, կամ թողնում տպավորություն, որ Մարուքյանը հավակնում է այդ հեռանկարում որոշակի քաղաքական տեղի եւ դերի: Հնարավոր է, որ անգամ հենց այդ հանգամանքն էր նրան հաջորդ օրը ոգեւորել խորհրդարանի ամբիոնի մոտ, բայց Սասուն Միքայելյանը փչացրեց ամեն ինչ: Այժմ Էդմոն Մարուքյանը գնացել է Արցախ քաղաքական «սպեցնազի» հետեւից:
Երկրորդ նախագահ Ռոբերտ Քոչարյանի խափանման միջոցի փոփոխության վերաբերյալ երաշխավորագրերի հանգամանքը, որ պարբերաբար ներկայացնում են նախկին իշխող համակարգի տարբեր տարիների բարձրաստիճան կամ ընդգծված այլ կարգավիճակ ունեցած գործիչները, վառ կերպով ընդգծում են այն բարդությունները, որ կան այդ համակարգի ներսում առերևույթ թվացող միատարության և կուռ գործողությունների համատեքստում: Ներկայումս դատարանն ինչպես հայտնի է քննում է ՀՀ և Արցախի նախկին չորս վարչապետների երաշխավորությունը՝ Կարեն Կարապետյան, Վազգեն Մանուկյան, Խոսրով Հարությունյան և Անուշավան Դանիելյան:
Հրապարակված ցանկացած տեսանյութ վերցվում է բաց աղբյուրներից, և տեսանյութում ընթերցվածը չի բխում մեր դիրքորոշումից և անձնական կարծիքից։ Եթե կայքում առկա են տեսանյութեր, որոնք վերաբերվում են Ձեր անձին, գրեք հաղորդագրություն, և մենք կհեռացնենք այն ։
