Qytetarët, por edhe turistet kanë një destinacion më shumë për të vizituar në Tirane. Bashkia ka kthyer në muze shtëpinë ku për shumë vite jetoi shkrimtari Ismail Kadare. Shumë shpejt sipas kryetarit të bashkisë Erion Veliaj në muze do të kthehet dhe shtëpia e shkrimtarit Dritëro Agolli.
Tiranës i shtohet një tjetër muze. Shtëpia ku shkrimtari Ismail Kadare punoi për disa nga veprat e tij më të njohura hapi dyert për qytetarët me përfundimin e projektit të bashkisë së kryeqytetit të udhëhequr nga arkitektja Elizabeta Terragni.
“Shprehja e Ismailit se gjithmonë ka kohë që njeriu të bëjë diçka të dobishme për vendin e tij, është fantastike. Në njëfarë mënyre gjetëm kohë, në shumë punë që ka qyteti, të bëjmë diçka të dobishme për vendin tonë, jo diçka ekskluzive të Tiranës, por diçka që lartëson, por edhe që hap një dritare për një nga figurat më emblematike, një nga markat më të njohura ‘Made in Albania’, që është Ismail Kadare, Helena dhe familja e tyre, si dhe vepra që ka buruar nga kjo shtëpi” , tha Veliaj.
Brenda apartamentit, ekspozimi ndahet midis dokumenteve origjinale, objekteve, librave dhe mobilieve, si dhe hapësirave ku mund të marrësh njohuri për veprën e shkrimtarit, në formën e një këndi leximi.
Por në Pallatin me Kuba, siç njihet ndryshe në kryeqytet, ka jetuar edhe shkrimtari i njohur Dritëro Agolli. Bashkia e Tiranës ka vendosur që edhe këtë apartament ta kthej ne muze.
“Jemi në diskutime me të dy fëmijët e Dritëroit që të bëjmë të njëjtën gjë, dhe ta kthejmë edhe atë në muze. Kështu, i gjithë pallati do të jetë i vizitueshëm. Fehmi Ibrahimi dhe të tjerë personalitete kanë jetuar në këtë pallat, ndaj besoj se herët a vonë do të kthehet në një destinacion ku Bashkia e Tiranës me muzeumet vendore do të fillojë një traditë të re”, tha kryebashkiaku.
Më pas i gjithë pallati do t’i nënshtrohet një ndërhyrjeje të thellë, që i është besuar arkitektit të tij, Maks Velo. Ky objekt i ndërtuar para viteve ’90 ishte shfaqje e modernizmit dhe rezultoi si një provokacion i vazhdueshëm për artin zyrtar të asaj kohe./ABC News Albania 24/7
![](https://s2.save4k.ru/pic/ykpBcg3HCkQ/maxresdefault.jpg)