Ali təhsilimi İstanbul şəhərində Yeditepe Universiteti Stomatologiya Fakultəsində almışam. 2011-ci ildə Avropa Parodontologiya Federasiyası tərəfindən akkreditə olunmuş parodontologiya üzrə rezidentura proqramını bitirərək Federasiyanın Parodontologiya və İmplantologiya üzrə ixtisaslaşmış mütəxəssis diplomunu almışam. 2012-ci ildə diş əti xəstəliklərinin cərrahi müalicəsi üzrə doktorluq dissertasiyamı müdafiə etmişəm, 2013-cü ildə isə Türkiyə Respublikası Səhiyyə Nazriliyinin Parodontologiya ixtisası üzrə uzmanlıq diplomu almışam.
Türkiyədəki 13 illik ali təhsilim sırasında müasir estetik stomatologiya ilə yanaşı həkim-parodontoloq olaraq dişlər və implantlar ətrafında dəstək toxumaların xəstəliklərinin diaqnostikası, profilaktikası, qeyri-cərrahi və cərrahi müalicəsi, həmçinin ağız boşluğunda implantların yerləşdirilməsi üzrə ixtisaslaşmışam.
2012-ci ildə Azərbaycan Parodontologiya Cəmiyyətinin həm-təsisçisi oldum və hal hazırda İdarə Heyətinin prezidentiyəm. 2015-ci ildən Əziz Əliyev adına Azərbaycan Dövlət Həkimləri Təkmilləşdirmə İnstitutunun Stomatologiya və üz-çənə cərrahiyyəsi kafedrasının əməkdaşıyam və hal-hazırda kafedranın dosentiyəm. Ölkəmizdə parodontologiya sahəsində müalicələrin, təhsilin və tədqiqatların müasir beynəlxalq standartlara uyğun aparılmasında, dişlər və implantlar ətrafında diş əti xəstəlikləri və ağız boşluğu sağlamlığının əhəmiyyəti haqqında ictimai məlumatlılığının artdırılmasında fəal iştirak edirəm.
Hal-hazırda həkim-stomatoloq və həkim-parodontoloq olaraq yüksək texnologiyalar ilə təhciz olunan və müasir beynəlxalq müalicə protokollarının tətbiq olunduğu Estetik Diş stomatoloji klinikasında fəaliyyət göstərirəm.
Klinikada estetik stomatologiya, dişlər və implantlar ətrafında diş əti xəstəliklərinin qeyri-cərrahi müalicəsi, fərdi ağız gigiyenasının maarifləndirilməsi, parodontitin və peri-implantitin regenerativ cərrahiyyəsi, diş əti çəkilmələrinin və yumşaq toxuma çatışmazlıqlarının parodontoloji plastik cərrahiyyəsi, diş ətinin estetik cərrahiyyəsi, çənələrdə implantların tətbiqi, frenektomiya və retensiyalı ağıl dişlərinin çəkilməsi kimi əsas ambulator xidmətləri göstərirəm.
20 ilə yaxın həkimlik fəaliyyətimdə uğurlu kliniki və estetik nəticələrin, həmçinin yüksək dərəcəli xəstə məmnuniyyətinin təmin olunmasına daima xüsusi diqqət yetirirəm.
Ещё видео!