Surja Muminun

Kjo sure, kryesisht përmend cilësitë dhe virtytet e besimtarëve. Ajo është njëfarë pasqyre për çdo besimtar.
Pasi përmend cilësitë e besimtarëve, kjo sure përmend fundin e atyre që nuk i ndjekin këto virtyte dhe cilësi.

Ajetet e para:
"Me të vërtetë, janë të shpëtuar besimtarët"
"të cilët janë të përulur në namazin e tyre." A e fal namazin me përkushtim o vëlla dhe oj motër? A e fal namazin në kohë?
"të cilët shmangen nga fjalët e kota" A merresh me përgojime dhe thashetheme?
"të cilët japin zeqatin të cilët e ruajnë nderin e tyre (nga marrëdhëniet e jashtëligjshme), përveçse me gratë e tyre ose me skllavet që kanë në zotërim - dhe, për këtë, nuk janë fajtorë. Ndërsa ata që kërkojnë përtej kësaj, pikërisht ata janë shkelës(të kufijve),
- të cilët u përmbahen amaneteve dhe detyrimeve të marra dhe të cilët i kryejnë rregullisht faljet."
Nëse i përket kësaj kategorie besimtarësh, atëherë prit shpërblimin e Zotit:
"Pikërisht ata do të jenë trashëgimtarët, që do ta trashëgojnë Firdeusin, ku do të qëndrojnë përjetësisht." (Muminun, 1-11)

Fundi i sures Muminun
Ajetet e fundit të sures Muminun janë lutje të drejtuara Zotit:
"Dhe thuaj (o Muhamed!): “O Zoti im, fal dhe mëshiro, se Ti je më i miri i mëshiruesve!” (Muminun, 118)
Kjo është mënyra më e mirë për t'a përmbyllur këtë sure. Kjo, pasi duke lexuar mbi cilësitë e besimtarëve të vërtetë, nuk do të mund t'ju përmbahen të gjithave. Kështu, do të gabojnë dhe do i shkelin disa prej tyre. Për t'a shlyer gabimin, kanë nevojë të luten dhe t'i kërkojnë Zotit falje dhe mëshirë.

Çdo sure ka një objektiv
Të gjithë suret që kemi trajtuar, përmirësojnë dhe kurojnë një nga çështjet kryesore të besimit. Surja Junus, trajtonte besimin në caktimin e Zotit. Surja Hud përqendrohej në ekuilibrin e muslimanit mes rrëmbimit dhe dorëzimit. Kështu, në çdo sure që lexon dhe e kupton siç duhet, ndjen që diçka brenda teje përmirësohet dhe rregullohet.
Dhjetë xhuzet e parë të Kuranit, nga surja Bekare deri tek surja Teube, flitet mbi sistemin e jetës tënde si mëkëmbës mbi tokë. Surja Nisa vë theksin tek një prej vlerave dhe parimeve të këtij sistemi jete, që është drejtësia.
Surja Maide bën thirrje për mbajtjen e besës me Zotin. Kurse surja Teube hap derën e shpresës për t'u penduar nga të gjithë gjynahet, sado të shumta dhe të rënda qofshin.
Surja Isra, fokusohet kryesisht mbi vlerën dhe rëndësinë e Kuranit dhe të mesazhit të Zotit mbi tokë. Ajo të bën thirrje ty o njeri dhe o musliman që t'a ndjesh peshën dhe përgjegjësinë e kësaj detyre.
Surja Taha të ndërgjegjëson që islami është fe e lumturisë, prandaj nuk ke përse të kesh frikë, të të vijë zor dhe të jepesh pas qytetërimeve të tjera.

Thotë Zoti në Kuran:” I dërguari tha: O Zot, populli im e braktisi këtë Kuran.” (Furkan, 30)
Thonë dijetarët që braktisja e Kuranit është në gjashtë forma:
1 – Mos leximi dhe mos dëgjimi i Kuranit.
2 – Mos dëgjimi i Kuranit me vëmendje gjatë leximit ose dëgjimit.
3 – Të mos punosh sipas urdhërave të tij.
4 - Nëse të vjen turp të lexosh Kuran, prej shokëve ose të pranishmëve. Ose të të vijë turp të zbatosh ligjet që gjenden në Kuran.
5 – Të mos e kesh Kuranin si gjykatësin tënd.
6 – Të mos kërkosh shërim nga Kurani, prej sëmundjeve të zemrës. Thotë Zoti në Kuran:“Ne kemi zbritur pjesë nga Kurani të cilat janë shërim dhe udhëzim për besimtarët, kurse keqbërësve nuk u shton veçse humbje.” (Isra 82)
Kurani është shërues për problemet dhe sëmundjet psikologjike por edhe fizike. Kushdo që vuan nga depresioni le t'a kërkojë shërimin dhe ilaçin në Kuran. Kushdo që ndihet i lodhur, le t'a kërkojë prehjen dhe qetësinë tek Kurani. Kushdo që ndihet i mbytur në halle dhe telashe, le t'a kërkojë zgjidhjen tek Kurani.
Lexoje Kuranin, mësoje dhe zbatoji porositë e tij, të jetosh i lumtur. Kurrë mos të të vijë turp dhe zor nga Kurani dhe kurrë mos e braktis atë.
Asnjë ditë mos të kalojë pa lexuar qoftë dhe një faqe Kuran. Asnjë ditë mos të kalojë pa medituar qoftë dhe rreth një ajeti të vetëm nga Kurani. Asnjë ditë mos të kalojë, pa vënë në jetë qoftë dhe një ajet të vetëm nga Kurani. Lexoje Kuranin, mësoje dhe vëri në jetë mësimet e tij, me synimin që të shërohesh nga çdo ves dhe e metë.
Në fund, paqja e Zotit qoftë mbi ju!

свернуть