Agahinda, Cyprien RUGAMBA & Ballet Amasimbi n'Amakombe
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
Barahagarutse hali mu gitondo
Bava i Kigali bajya ku Gisenyi
Nali nanze yuko tujyana ngirango nzabahishire.
Mwana mutoya ararira cyane ati Mama ntago asigara
Abakuru bombi baramuhojeje bati turabanguka tumusange.
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
Nali nateguye impamba isukuye nshyira mu gakangara gatatse
Umugabo wanjye nti uramenye abana, inzara ntibice muli kumwe.
Kandi nawe ntugire inyota, nashyizemo akayoga ukunda.
Ejo nimugaruka muzasanga uruhisho rwiza mba mbaroga!
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
Ibirezi byanjye byarenze mbirora biseka byose byishimye
Nkiva ku irembo ngarutse mu rugo agahinda karanga karanyica.
Negura uruhisho rw'amayira anyuranye ngo nibaza bazishime
Naruhishe cyane ngo bazarushake na byo bibe ibindi byishimo.
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
Bwamaze kwira radio iravuga, izina ryanjye ndyumvamo
Umutima wanjye numva urakubita aliko ntazi icyo bavuze
Umugore araza utuye aho hafi ahinguka asesa amalira
Nanjye mubonye mbura icyo mubwira ikiniga cyanzibye umuhogo.
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
Ati umugabo wawe n'abana bose Imana ibahamagaye mu mwanya
Ivatiri ikamyo yayikubise ntiharokoka n'umwe
Sinzi uko byaje kumera ako kanya, nagaruye ubwenge ndi mu bitaro
Ntabwo niyahuye Imana yaranze, uwampa ngo insindire agahinda.
Burya agahinda mwumva ntikica ahubwo kagira mubi
Cyane cyane iyo kava ku bana no k'uwo mwababyaranye.
![](https://s2.save4k.ru/pic/zVWkKxdcYUQ/mqdefault.jpg)