18.10.18 Әл-Фараби атындағы ҚазҰУ-да ІІІ Халықаралық Түркі Дүниесі деректі фильмдер фестивалі басталды.
"Сегіз ел, сегіз шаһар, бір фестиваль" ұранымен өтіп жатқан фестиваль биылғы жылы Түркияның Ыстамбұл қаласында басталып, Әзірбайжанның Баку шаһарында жалғасса, бүгін атажұрт - Қазақ Еліне табан тіреді.
Фестивальдің биылғы тақырыбы Ана, яғни Түркі әйелдерінің бейнесін ашып көрсету.
Түркі дүниесі халықаралық журналистер федерациясы мен әл-Фараби атындағы ҚазҰУ бірлесіп өткізіп жатқан бұл фестивальдің қазақстандық күндері өте тығыз кестемен өтуде.
Түстен кейін ҚазҰУ-ға жеткен негізгі ұйымдастыру комитетінің мүшелері қайтадан ерекше безендірілген Әл-Фараби кітапханасын (кітапхананың әр қабаты әртүрлі тақырыпқа сай, мысалы астыңғы қабат Әл-Фараби музейі, екінші қабатта, "Түгел түркі түбі бір түп анасы - Көкбөрі" дегендей, көкке қарап айбат шеккен көкбөрінің мүсіні және соған сай экспозициялар қойылса, үшінші қабатта Алаш орда тақырыбы, ал төртінші қабаты "Мәңгілік Қазақстан" композициясы орналасқан) аралап шыққан соң, ҚазҰУ Телерадиокешенінің студияларын (Фотостудияда фотоға түсіп, Радиостудияда тікелей эфирге шығып, М.К. Барманқұлов атындағы телестудияда сұхбаттасып) аралап, сосын Журналистика факультетінің мәжіліс залында оқытушылар құрамы мен шәкірттермен кездесті. Факультет деканы Сағатбек Медеубек әрбір қонақты жеке таныстырып, арасында "Кәмила Әже" , "1м2" деректі фильмдерін көрсетіп, соңы сұрақ-жауапқа ұласты.
Содан соң, мәртебелі меймандарды университет ректоры Ғалымқайыр Мұтанов арнайы қабылдап, алдағы уақытта қандай бірлескен шараларды өткізуге болатындығын талқылады.
Бас ғимараттан шыққаннан кейін Халықаралық қатынастар және Шығыстану факультетінің оқытушылары мен студенттерімен кездесті. Мұнда да таныстыру шараларынан соң "Ибн Сина" атты деректі фильм көрсетілді.
Кездесу соңында факультет деканы Сағынғали Айдарбаев пен ҚазҰУТелерадиокешенінің директоры Дәурен Мақсұтханұлы жиылған қауымға фестивальдің маңызы мен қызметі жайлы баяндап берді.
Негізгі шаралар мен көрсетілімдер 19.10.2018 ж. өтеді.
Таңертең сағат 10:30-да Ректораттың мәжіліс залында салтанатты ашылу рәсімінен басталып, деректі фильмдердің көрсетілімімен жалғасады.
Кинокөрсетілімдер "Керемет" СҚКО кинозалында сағат 14:30-дан бастап кешкі 18:30 дейін өтеді.
Кіру тегін.
#Turkbelgeselfimfest #AlFarabiUniversity #TRCKazNU
#ТүркідүниесіДеректіФильмдерфестивалі
#ҚазҰУ
#ҚазҰУТелерадиокешені
#ҚазҰУЖурфак
#КереметСҚКО
@al_farabi_tv
@alfarabiradio_kaznu
#dauryatm
Ещё видео!