Bu ömür bağında sənsiz nə gül açdı soldu getdi
Solub incə-incə güllər, ayaqaltı oldu getdi
Solan incə güllər, ey gül, son ümidlər idi məndə
Səni gözləməkdən onlar, deyəsən, yoruldu getdi
Gecə keçdi, gündüz oldu, bu ömür tükəndi bir-bir
Qəmə qəm calandı gəldi, günə gün qoşuldu getdi
Havasan mənimçün, ey şux, geri dönməsən deyərlər
Nəfəsindən ayrı düşdü bir adam, boğuldu getdi
Məni görcək eşqə düşmüş dedilər təəssüf ilə
Kimə çəkdi, Allah-Allah bu uşaq pozuldu getdi
Sənə bu zavallı Pünhan nə qədər desin, bağışla
Yenə gəldi aciz-aciz, qapıdan qovuldu getdi
![](https://i.ytimg.com/vi/zhss27m37QA/maxresdefault.jpg)