Колумбияда апаттан кейінгі жағдайды қалпына келтіруге қанша ақша бөлінбек? Ирактың қарулы күштері Мосулдағы шабуылды неліктен тоқтатып отыр?
Индира Жылқайдарова, тілші:
-Колумбияда селдің салдарынан мерт болғандар қатары 254-ке жетті. Оның 50-ге жуығы – балалар мен бүлдіршіндер. Мокоада қаза тапқандар санының осыншаға жеткенін Колумбия Президенті Хуан Мануэль Сантос растады. 400 адам жараланған, тағы 200 адамның тағдыры белгісіз. Билік жағдайды қалпына келтіру үшін 1,2 млрд песо бөлетін болды. Бұл –шамамен 415 мың АҚШ доллары.
Ирак әскері бейбіт тұрғындарды құтқарып қалу үшін Мосулдағы шабуылды уақытша тоқтатты. Себебі лаңкестер оларды тірі қорған ретінде ұстап отыр. Қалада 400 мың бейбіт тұрғын бар. Мосулдан ешкімнің өз күшімен шығуға мүмкіндігі жоқ. Ауыз су, азық-түлік таусылған. Гуманитарлық көмек айына екі-ақ рет жеткізіледі. Ирак және Левант лаңкестік ұйымының содырлары өз жасағына тіпті әйел снайперлерді алған көрінеді.
Оңтүстік Корея, АҚШ, Жапония елдері Солтүстік Кореяның су асты қайықтарына қарсы күрес жүргізу үшін Корея бұғазында теңіз жаттығуларын бастады. Бұл мақсатта үш ел алғаш рет бірігіп отыр. Оңтүстік Кореядағы Чеджудо аралындағы жаттығулар үш күнге созылмақ. Бұл қадам – Пхеньян тарапынан туған қауіпке тойтарыс берудің амалы.
Ал Гонконгта өткен аукционда Қытай көсемі Мао Цзэдунның портреті 12 млн 700 мың долларға саудаланды. Портретті атақты американдық суретші Энди Уорхол 1973 жылы салған. Құнды туындыны азиялық коллекционер сатып алыпты. Бірақ аты-жөнін әлемге жарияламауды өтінген. Айта кетейік, Мао Цзэдунды қатты қадір тұтатын Қытайда оның құрметіне 180 ескерткіш орнатылған екен.
Ещё видео!