Türkmenistanyň Bedenterbiýe we sport baradaky döwlet komitetiniň, Türkmenistanyň Bilim ministrliginiň hem-de «Türkmenistan» Ýaşlar bedenterbiýe-sport guramasynyň bilelikde guramagyndaky «Türkmenistan — ruhubelentligiň we sagdynlygyň ýurdy» atly XII Uniwersiadanyň çäginde türkmen milli göreşi boýunça ýaryş geçirildi.
Türkmen döwlet bedenterbiýe we sport institutynda geçen ýaryş agramlaryň sekizisi boýunça bäsleşikleri özünde jemledi. Oňa talyp türgenleriň 90-dan gowragy gatnaşdy. Göreşiň düzgünlerine laýyklykda geçen bäsleşikler ajaýyp emellere diýseň baý boldy. Ýaryş iki günläp dowam etdi.
Türkmen milli göreşi türki halklara mahsus bolan guşakly göreş bilen diýseň ýakyn bolan gadymy görnüşleriň biridir. Taryhy çeşmelerde türkmen durmuşynyň bezegine öwrülen bu göreş bilen diňe erkekleriň däl, eýsem, zenanlaryň hem meşgullanandygy hakyndaky maglumatlara duş gelmek bolýar.
Ussat halypalar iň zehinli şägirtlerinden ýagyrnysy ýere degmeýän pälwanlary ýetişdiripdirler. Göreşiň düzgünleri bolsa asyrlaryň geçendigine garamazdan, özüniň asyl nusgasyny saklap galypdyr we biziň günlerimize gelip ýetipdir.
Göreşde pälwanlar garşydaşynyň bedeniniň dabanyndan beýleki agzalaryny ýere degirmek bilen utuklary toplaýarlar. Türkmen milli göreşiniň esasy aýratynlyklarynyň biri-de, aýagyň işjeňligini ulanmak bilen baglydyr. Aýak bilen badak almagyň görnüşleri türkmen milli göreşiniň bezegidir.
Göreş Türkmenistanda diňe sport görnüşleriniň biri hasaplanman, halkymyzyň milli medeniýetiniň aýrylmaz bölegi hem-de fiziki işjeňligiňi kämilleşdirmegiň ähmiýetli ýoly hökmünde hem uly abraýdan peýdalanýar.
Onuň 2016-njy ýylda ÝUNESKO-nyň Adamzadyň maddy däl gymmatlyklarynyň sanawyna girizilmegi bolsa göreşiň halkara giňişlikdäki uly abraýyny görkezýär.
#turkmenistan #salamnews #turkmensport #turkmengoresh
![](https://s2.save4k.ru/pic/r1LVNEK8kHE/maxresdefault.jpg)